COMMENT
LA BELLE FILLE DE PORTILLON
QUINAULDA SON IUGE.
La Portillonne, laquelle devint, comme ung chascun sçayt, la Tascherette, estoyt buandière paravant d’estre taincturière, au dict lieu de Portillon, d’où son nom. Si aulcuns ne cognoissent Tours, besoing est de dire que Portillon est en aval de la Loire du costé de Sainct-Cyr, loin du pont qui mène à la cathédrale de Tours, autant que ce dict pont est loin de Maimoustier, veu que le pont est au mitan de la levée entre le dict lieu de Portillon et Maimoustier. Y estes-vous ? — Oui. — Bon ! Adoncques, la fille avoyt là sa buanderie, d’où elle devalloyt en ung rien de temps pour laver en la Loire, et passoyt sur une toue pour aller à Sainct-Martin, qui se treuvoyt de l’aultre costé de l’eaue où elle rendoyt la plus grant part de ses buées en Chasteauneuf et aultres lieux.
