— Vous aymez doncques vostre vache mieulx que le salut de vostre ame !
— Vère, monseigneur, nostre beste est quasiment la moitié de nostre paouvre vie.
— Ie m’esbahis, ma fille, de vous sçavoir paouvre et ainsy haillonnée, houzée comme ung fagot, pieds nuds par les champs ung dimanche, alors que vous portez plus de threzors que vous n’en foulez au parcours du domaine abbatial. Ceulx de la ville vous doibvent poursuyvre et tormenter d’amour.
— Nenny, monseigneur, ie appartiens à l’abbaye, feit-elle en monstrant à l’orphebvre ung collier à son bras senestre, comme en ont les bestes ez champs, mais sans clochette. Puis gecta ung tant desplourable resguard au bourgeoys, que il en demoura tristifié, veu que par les yeulx se communiquent les contagions du cueur, quand fortes elles sont.
— Hé ! que est de cecy ? reprint-il, voulant s’enquerir de tout.
Et il toucha le collier où estoyent engravées les armes de l’abbaye moult apparentes, mais que il ne voulut point veoir.
— Monseigneur, ie suis fille d’ung homme de corps. Par ainsy, quiconque s’uniroyt à moy par mariaige tomberoyt en servaige, feust-il bourgeoys de Paris, et appartiendroyt corps et biens à l’abbaye. S’il m’aymoyt aultrement, ses enfans seroyent encores au domaine. A cause de ce, suis délaissée d’ung chascun, abandonnée comme une paouvre beste des champs. Mais, dont bien me fasche, seroys-je, selon le plaisir de monseigneur l’abbé, couplée en temps et lieu avec ung homme de corps. Et ie seroys moins laide que ie ne suis, que, au veu de mon collier, le plus amoureulx me fuyroyt comme la peste noire.
En ce disant, elle tiroyt sa vache par la chorde pour la contraindre à les suyvre.
— En quel aage estes-vous ? demanda l’orphebvre.
— Ie ne sçays, monseigneur ; mais nostre sire abbé le ha en notte.
Ceste grant misère touchia le cueur du bon homme, qui avoyt pour ung long temps mangié le pain du malheur. Il conformoyt son pas à celluy de la fille, et ils alloyent ainsy devers l’eaue en ung silence bien estoffé. Le bourgeoys resguardoyt le beau front, les bons bras rouges, la taille de royne, les pieds pouldreux, mais faicts comme ceulx d’une Vierge Marie, et la doulce physionomie de ceste fille, laquelle estoyt le vray pourtraict de saincte Gene-
