capparassonoyent. Et messer Cappara les frosloyt de l’œil, iurant que, le iour où l’une d’elles luy donneroyt son doigt à baiser, il en auroyt tout.
Entre ces dames de hault lignaige, une s’enquit ung iour de ce gentil Florentin à luy-mesme, luy demandant pourquoy se faisoyt-il si farouche, et si nulle femme de la Court ne le sçauroyt apprivoiser. Puis l’invita gracieusement à venir chez elle à la vesprée.
Messer Angelo de se perfumer, d’achepter ung manteau de veloux à crepine doublé de satin, d’emprunter à ung amy une saye à grans manches, pourpoint tailladé, chausses de soye, et de venir et de monter les degrez d’un pied chauld, respirant l’espoir en plein gozier, ne saichant que faire de son cueur, qui bondissoyt et sursaultoyt comme chievre ; et pour tout dire d’un coup, ayant par advance de l’amour de la teste aux pieds à en suer dedans le dos.
Faictes estat que la dame estoyt belle. Ores, messer Cappara le sçavoyt d’autant mieulx que, en son mestier, il se cognoissoyt aux emmanchemens des bras, lignes du corps, secrettes entourneures de la callipygie et aultres mystères. Doncques, ceste dame satisfaisoyt aux règles espéciales de l’art, oultre que elle estoyt blanche et mince, avoyt une voix à remuer la vie là où elle est, à fourgonner le cueur, la cervelle et le reste ; brief, elle mettoyt en l’imagination de délicieuses imaiges de la chouse, sans faire mine d’y songier, ce qui est le propre de ces damnées femelles.
Le sculpteur la treuva sise au coin du feu, dedans une haulte chaire et vécy la dame de deviser à son aise, alors que messer Angelo n’osoyt dire aultre françoys que oui et non, ne pouvoyt rencontrer aulcunes paroles en son gozier, ne aulcune idée en sa cervelle, et se seroyt brisé la teste en la cheminée, si n’avoyt eu tant d’heur à veoir et ouyr sa belle maistresse, qui se iouoyt là comme ung mouscheron en ung rais de soleil.
Pour ce que, obstant ceste muette admiration, tous deux demourèrent iusques au mitan de la nuict, en s’engluant à petits pas dedans les voyes fleuries de l’amour, le bon sculpteur s’en alla bien heureux. Chemin faisant, il conclud à part luy que, si une femme noble le guardoyt ung peu près de sa iuppe, durant quatre heures de nuict, il ne s’en falloyt pas d’ung festu qu’elle ne le laissast là iusques au matin. Ores, tirant de ces prémisses plusieurs iolys corollaires, il se résolut à la requérir
