Page:Arnaud - De la frequente communion, 1643.djvu/432

de l’empire, apres avoir remporté une victoire toute remplie de miracles, de laquelle il avoit esté asseuré de la part de Dieu par la bouche d’un grand solitaire, dans laquelle les vents et les tempestes avoient combattu pour sa querelle, et par laquelle il asseura la paix de l’eglise, et la tranquillité de toute la terre ; il s’abstinst assez long-temps de la participation des mysteres, n’ayant pas voulu porter si tost à l’autel ses mains encore teintes du sang de ses ennemis, quoy qu’il eust esté si justement respandu. En quoy il se trouve que ce prince apres avoir imité par sa penitence publique l’exemple illustre de la penitence de David ; l’imita encore par cette action ; puis qu’il fit par le mouvement de sa pieté, ce que David fit par l’ordre de Dieu, lors qu’il receut le commandement de ne point bastir le temple où l’arche qui estoit figure de l’eucharistie devoit reposer, à cause seulement qu’il avoit respandu le sang des ennemis d’Israël, et de Dieu mesme. Que si vous pensez improuver cette humilité de Theodose, comme l’effet d’une devotion mal reglée ; apprenez, qu’elle estoit si conforme à l’esprit du christianisme, que l’eglise ordonnoit, (ainsi que Saint Basile tesmoigne) que ceux qui auroient tué des ennemis en guerre se separassent fort long-temps de l’eucharistie, marquant par là l’extréme pureté,