Ouvrir le menu principal

Page:Arnaud - De la frequente communion, 1643.djvu/371

Cette page n’a pas encore été corrigée


apres qu’un ange eut asseuré qu’il ne naissoit que pour l’accomplissement de cét oracle, apres avoir deslié la langue de son pere pour en recevoir encore une nouvelle confirmation, passe neanmoins presque toute sa vie dans le silence, et dans la retraitte, et ne sort du desert pour faire sa charge à laquelle il sçavoit que Dieu l’avoit desja appellé tant de fois, et d’une maniere si extraordinaire, que par un nouvel ordre, et par une nouvelle mission du Saint Esprit : (...) ; le seigneur parla à Jean dans le desert.

Et avant luy, Moyse, qui est le premier de tous les officiers de l’eglise figurée par la synagogue, se laisse appeller plus de trois ou quatre fois, resistant tousjours à la voix manifeste de Dieu, qui se descouvroit à luy, et luy parloit plus clairement qu’il n’avoit fait aux patriarches. Il se tenoit tres-content de servir Dieu dans le desert, où il estoit depuis quarante ans, et de n’avoir point d’autres occupations, que de paistre des brebis, quoy qu’il eust tousjours esté nourri dans la cour des roys, et dans les armées, et destiné à la succession d’un royaume, et qu’il fust remply non seulement de la science des egyptiens, mais aussi de celle des saints patriarches. Et ce qui estonne davantage dans cette opposition qu’il fait à Dieu, c’est qu’il sçavoit, qu’il avoit esté miraculeusement preservé de la mort, et adopté par la fille de