tergum reversis, venienti Deæ obvium commonstrarent obsequium : et quæ pectines eburneos ferentes, gestu brachiorum, flexuque digitorum, ornatum atque oppexum crinium regalium fingerent ; illæ etiam quæ cæteris unguentis et geniali balsamo guttatim excusso, conspargebant plateas.
Magnus prætereà sexus utriusque numerus, lucernis, tædis, cereis, et alio genere fascium, lumine siderum cœlestium stirpem propitiantes. Symphoniæ dehinc suaves, fistulæ tibiæque modulis dulcissimis personabant. Eas amœnus lectissimæ juventutis veste nivea, et cataclista prænitens sequebatur chorus, carmen venustum iterantes : quod Camœnarum favore solers poëta modulatus, edixerat, quod argumentum referebat interim majorum antecantamenta votorum.
Ibant et dicati magno Sarapi tibicines : qui per obliquum calamum ad aurem porrectum dextram familiarem templi Deique modulum frequentabant : et plerique, qui facilem sacris viam dari prædicarent. Tunc influunt turbæ sacris divinis initiatæ, viri feminæque omnis dignitatis et omnis ætatis,
