Page:Apulée - Les Métamorphoses, Bastien, 1787, II.djvu/204

formidolosum familiarem istum sortita es : qui insuavis et odiosi mariti tui caperatum supercilium ignaviter perhorrescit ; ac per hoc amoris languidi desidia tuos volentes amplexus discruciat. Quanto melior Philesieterus, adulescens et formosus et liberalis et strenuus, et contrà maritorum inefficaces diligentias constantissimus ! dignus hercules solus omnium matronarum perfrui deliciis : dignus solus coronam auream capite gestare, vel ob unicum istud, quod nunc nuper in quemdam zelotypum maritum eximio studio commentus est. Audi denique, et amatorum diversum ingenium compara. Nosti quemdam Barbarum, nostræ civitatis decurionem, quam scorpionem, præ morum acritudine, vulgus appellat, hic uxorem generosam, eximia formositate præditam, mira custodela munitam, domi suæ quàm cautissimè cohibebat. Ad hæc, ultima pistoris illa uxor, subjiciens : Quidni ? inquit, novi diligenter. Aretem meam condiscipulam memoras. Ergò, inquit anus, nosti totam Philesieteri etiam ipsius fabulam ? Minimè gentium, inquit ; sed nosse valde cupio, et oro mater, ordine mihi singula retexe.