Toute sa gent et mout bien ordenée.
Et Doz li Gris ra la soie atornée.
Droon d’Amiens la premiere a livrée :
.C. chevaliers, n’i a cel n’ait espée.
Cil en movront encui telle mellée,
Dont mainte larme et dolor iert menée.
En la seconde eschiele fut Richars,
Cil d’Aubeville qui fut prous et gaillarz,
Et de Biauvez Guion et Lienarz :
.C. chevaliers enmainent en lor part.
La tierce guie de Peronne Gerart,
Et de Baupaumes fu o lui Ricoart :
.C. chevaliers ot a lor estendart ;
N’i ot celui ne fust fel et gaingnart.
En la cinquisme eschiele fut Guion,
Cil de Saint Just qui mout fut sages hon ;[1]
Aveques lui estoit de Hans Huedon.
N’i a celui n’ait destrier arragon,
Et bone espée et escu au lyon,
Dont a clox sont fermé li confanon.
Li quens Guillaumes, li sires de Monclin,
Qui frere fut au felon Rancelin,
Conduist et guie par delez .j. sapin
La siste eschiele sans noise et sans hustin.
.C. chevaliers le suient le chamin.
Manasant vont Raoul dou Canbroisin,
Le roi Girbert et Hernaut et Gerin ;
Mout duremant menacent Mauvoisin.
En la setiesme eschiele des Flamans
Fut Rancelins, qui sires iert de Lans.
.CCCC. homes, toz devisez par ranz,
Le vont sivant a hauberz jazeranz ;
Serré s’an vont, correciez et dolanz.
- ↑ 531 Saint, ms. ss.
