Puis li a dit maintenant sans noissier :
« Je vos deffi. » Lor broche le destrier ;
Vers Lenz s’en va, quant que pot eslaissier,
Sus le destrier qui fut fort et coursier.
Li quens R. nel vout pas enchaucier ;
Le cors fist panre del vaillant chevalier ;
Droit a Cambrai s’en prist a repairier,
A pié descent desoz .j. ollivier.
Li ampereres, por lui esbanoier,
Fut apoiez as estres del sollier,
O lui Girbers et Gerins le guerrier,
Li quens H[ernaus] et Mauvoisins le fier,
Et le lignage qui mout fist a proisier.
Virent R. descendu en l’erbier,
Le cors lez lui sor l’escu de quartier.
Girbers le voit, n’ot an lui qu’aïrier ;
Isnelemant avale le planchier,
Vint a R., sel prant a araisnier :
« Dites, coisins, nel me devez noier,
« Qui est cil cors, est il de chevalier ? »
Dist R. : « Sire, c’est un miens soldoier
« Que devant moi m’a hui ocis Bernier,
« Celui qui ier vos servi au mangier.
— Dex ! » dit Girbers, « biax pere droiturier,
« A sa nature doit toute rien repairier. »[1]
Lore fist le cors R. apareillier,
Et enterrer et mout bien messoier.
El palès fut li rois cui France apent,[2]
O lui Girbert et Gerin le vaillant
Et le riche lignage qui mout estoit poissant.[3]
R. se clainme au roi premieremant
- ↑ 378 Vers alexandrin. C’est un proverbe qui aura été conservé sous la forme originale : Omne genus ad suam naturam revertitur (Marcolphus, dans Gartner, Proverbialia dicteria, 1575, fol. Y 3 vo ; Kemble, Anglo-Saxon dialogues of Salomon and Saturn, p. 52 no 207. Cf. Marcabrum (L’autrier jost una sebissa) : .... tota creatura | Revertis a sa natura.
- ↑ 381. 408, cui, ms. qui.
- ↑ 383 Suppr. riche.
