« Bien seroit chier icelui cop vandu. »
Et dist Doonz : « Cist consous iert creü.
« Demain a l’aube, quant jors iert aparu,
« Nos esmovrons tuit et jovie et chanu. »
Un valleton ot leans enbatu,
Qui en son cuer ot trestot retenu ;
De leanz part, que n’est aperceü.
Tant a de nuit et de jor acoru,
Sor .j. roncin chaceor malostru,
Qu’a Canbrai est au parron descendu.
R. demande, tantost mostrez li fu.
Voit le li gars, ne se tint mies mu,
A soi l’apele desoz .j. arc volu ;
Cil li conta tot ce que ot veü.
Et dist R. : « Bien seront receü,
« Mès que ne soie sorpris ne deceü.
« Droit a Paris soit ton chamin tenu,
« Et di au roi que tost soit porveü
« De moi aidier, que besoin est venu. »
Li mès s’en torne, que n’i est arestu.
De Cambrai ist li cortois messagier,
Anvers Paris panse del chevauchier.
Et Raoulz panse de soi apareillier :
Ses barbacaignes a bien fait atirier,
Entor lui sont mandé li chevalier
Et li sergent et li arbalestrier.
Ains que fust nonne furent bien .iij. millier,
Sans celz dedans qui sont preu et legier.
.VII.m. furent et plus, au mien cuidier,
Tuit apresté de lor seignor aidier.
R. les vit, ses prant a araisnier :
« Signor, » dist il, « por Deu le droiturier,
« Ci vient sor moi .j. lignage mout fier
« Qui n’ainment Deu ne ne m’ont gaires chier,
« Ne sairement ne prisent .j. denier.
« Por Deu vous pri, qui tot ait a jugier,
« De mon annui et del vostre vangier. »
Et cil respondent : « Bien sachiez, sans cuidier,
Page:Anonyme - Raoul de Cambrai.djvu/411
Cette page a été validée par deux contributeurs.
300
raoul de cambrai
