Au chief de terme or oiés qu’elle dit :
« Par ma foit, pere, malvais servise a ci.
« Quant me donastes H. de Pontif,
« Bien saviés vous que j’avoie marit. »
Dist B. : « Dame, or le laissiés ainsi,
« Que acordés sonmes et moi et li. »
Elle respont : « Tot a vostre plaisir,
« Mais j’ai paor que ne me face pis. »
A icet mot le convient a soffrir.[1]
Henriet firent baingnier et revestir.[2]
Au matinet, quant vint a l’esclarcir,
Vont oïr messe li chevallier jantil,
Et s’i mena B. son jone fil.
Gr. l’arma et chevallier le fit ;
Puis retornerent el palais signori.
Grans fu la joie, ce saichiés vous de fi.
.VIII. jors tous plains sejornerent ainsis ;
Et quant ce vint a la cort departir,
Gr. apelle B. le hardi :[3]
« Sire, » dist il, « entendés anvers mi :
« Je vuel aler saint Jaque requerir.
« La voie i dois, ce saichiés vos de fi. »[4]
Et dist B. : « Or entendés a mi,
« Que .v. ans a que la voie i promis. »
Dist Gr. : « Frere, alons [i] moi et ti. »
Et dist B. : « Par ma foit, je l’ostri.
« Noumés le jor que nous movrons de ci. »
.VIII. Pasque i ont le terme mis,[5]
Puis s’en revait li Sors en son païs.
B. remest et o lui si dui fil,
Et sa mollier qui molt par fu gentil.
Page:Anonyme - Raoul de Cambrai.djvu/392
Cette page a été validée par deux contributeurs.
281
raoul de cambrai
