Lors se demante et tint la teste encline :
« E Diex ! » dist elle, « dame sainte Marie,
« Ne mon singnor ne mon fil n’ai je mie.
« Que fera ore ceste lasse chaitive ?
« Hahi ! B., de ta chevallerie
« Ne vis je nul en trestoute ma vie.
« Or vous ont pris celle gent païnie !
— Taisiés vous, dame, » Savaris li escrie.
« Cil le vous rende qui vint de mort a vie !
« Ralons nous ent vers France la garnie. »
Elle respont : « Je l’ostrois, biax dous sire. »
Monter la fist sor .j. mul de Surie,
Et puis monta sa riche baronnie ;
De la ville issent, qu’il ne s’atargent mie.
Tant ont erret et tant lor voie tinrent,
Qu’a Ribuemont an .xv. jors revinrent.
Encontre vont trestuit cil de la ville.
A Savarit ont conmenciet a dire :
« Biax sire chiers, ou est B. no sire ?
— Singnor, » fait il, « certes il n’i est mie :
« Devant Saint Gile l’ont pris gens païnie. »
Quant cil l’entendent, n’i a cel qui en rie ;
Grans fu li duels a Ribuemont la ville.
Grans fu li duels et mervillox li cris,
Et la novelle en vait par le païs
Del franc Bernier que paien orent pris
Devant Saint Gile, au grant abateïs.
.I. mès en vait au roi de Saint Denis
Qui tout l’afaire li ot contet et dit,
Et plus ancore que il n’avoit oït :
« Sire, » fait il, « or saichiés vous de fi,
« Mors est B., li genre au sor Gr.
— Est ce dont voirs ? » dist li rois Loeys.
