Où il avoit [jà] aultre foiz esté.
Forment l’anchauce le peuple Damme Dé,
Nesmes l[y] ducs s’y a les Franczoys guié,
L[y] roys a l’ost droit après luy mené,
Juques Nyvet ne se sont aresté.
Ilec [il] ont Aiquin avironné,
Tandent lours loges et paveillons et trés.
La nuyt reposent juques fut ajourné.
Demain à l’aube se est Aiquin levé,
Et vit lost Charlez qui illec est asemblé,
Forment en fut couroce et iré.
Il et sa gent se sont tost adobé,
De richez armez vestuz et courc[el]ez,
Du chastel eyssent touz rengez et serrez,
Lours cors cornerent, lours tambours ont souné,
Isnellement sont es Franczoys alé.
AIquin ly roys, que Jhesu mal aye !
Dou chastel eist, ne s’est aseuré mye.
Sounent lours cors, grant en fut la baudie ;
Quant il fut hors, moult fort [il] se escrie :
« Ferez paens sus ça gent malaye
« Qui m’ont tolet ma famme et ma mye, (fo 56)
« Que j’amaye plus que riens qui soit en vie,
« Et Quidalet la fort cité garnie,