« Sus ceste crouez qui moult fait à louer,
« Que mal lour vienge ains [que] l’an [soit] passez !
« Et me lessez en ça cité entrer,
« Que ge la puisse des payens delivrer ;
« Crestïenté y meptre et alouer ! »
A ces parolles se fut davant l’auter
Et saint Servan commence à reclamer.
QUant Charlemaine[s] a Jhesu reclamé,
Davant la crouez, tout droit si s’est tourné :
« Saint Servan sere ! dist Charlez le sené,
« Vroy martyr, cousin es Damme Dé, (fo 36)
« De par la Virge qui Jhesu a porté ;
« Sere, vous fustes dou ciel saint parempté ;
« Bien le ouy quar l’en le m’a conté ;
« Anne fut mere Marie pour verité,
« Don Dieu nasquit le roy de majesté ;
« Anne la dame, qui fut de grant bonté,
« Ot une seur de grant nobilité.
« Saint Servan sere ! bon saint beneüré !
« Entre Egypte vous print ung amiré,
« En une chartre fustes mis et posé.
« Là vous garderent juqu’au tiers jour passé,
« (Onc ny goutastes ne de pain ne de blé,
« Ne de nul vivre, si ne vous tranmist Dé,)
