Des Sarrazins fut moult grand ly esguart,
Qu’en Quidallet estruent de l’autre part
D’autre part Rence ou flote Chaliart.
Aiquin a deul, à pouay qu’il ne part,
Quant de sa gent a veü tel essart,
De son lignage à bien leans le quart.
MOult fut Aiquin courocé et iré
De son chastel qu’il voit enxin bruslé,
Et de ses hommes qu’il voit ars et greslé.
Tel deul en a, à poay n’est forcenné,
De maltalant [s’]est à terre pasmé ;
Et l’emperis si l’avoit relevé,
Par troys foiz l’a besé et acolé :
« Sire, dist el, pour Mahom[met] mon Dé !
« Pour poay de chose estez ore efréé,
« Pour ung chastel que avez adiré ;
« En mal[e] heure fust il onques fondé ;
« Seignour, dommage avez moult enduré,
« Puys que roy Charles vint en ceste cité ;
« Lessez ce deul et ne soit plus mené,
« Quar pour deul fere n’est nul bien recoupvré.
« Chastiaulx avez encore à grant planté
« Parmé Bretaigne et du long et du lé. »
— « Damme, dist il, c’est fine verité,
