Ung eleys fait com chevalier elys,
Et vait ferir ung chevalier Turquis.
Et puis .IIII. aultres et puis .V. et puis .VI. ;
Forment se payne de venger ses amys ;
Le cheval point, erriere s’est gauchis,
Par son heaulme va feriz un marchis.
Riche personne, conseiller fut Aiquis,
Seguin ot nom le Tur en son pays.
Sus ses espaules luy avoit le branc mys, (fo 19)
Mort le trebuche dou destrier arabis ;
Crie : « Monjaye ! » l’ensaigne Saint Denis.
Nesmes le vait, sy a getté ung ris,
Au roy s’escrie : « Vous saiez benéys !
« Bien as vengé le bon duc Tïoris,
« De duc pour duc avez vangence prins ! »
A cest, moult ont payens le champ [guerpis] ;
Seguin emportent desus son escabis.
Aiquin s’en fuit, onc n’y a congé prins ;
Tant esperonne qu’en la Cité s’est mys.
Contre luy va la belle empe[re]ris,
Avant passa, par la regne l’a prins :
« Sire, dist elle, Mahom te soit amys !
« De tes novelles, s’il te plaist, si m’en dis ? »
Ly roys respont, com homs maltalentifs :
« Mors sont mes hommes et mes charnelx amys,
« Seguin est mort don moult suy affeblis,
« Mon frere ont mort et mon frere ont occis ! »
— « Peut ce estre voir ? » dist la dame o cler vis ;
Page:Anonyme - Le roman d'Aquin ou La conquête de la Bretaigne par le Roy Charlemaigne.djvu/174
Le texte de cette page a été corrigé et est conforme au fac-similé.
41
par le roy charlemaigne