E une porte paine qe descent por aval ;
Aval la leiscent core cele gient criminal.
Cels q’entrez li herent avrent fier batistal,
Tut .l. furent retenus par engal.
Pris furent li .l. o li quens Hengeler ;
Paiens nes ouserent oncir ne domajer,
Tant dotent cels defors qe bien feit a douter ;
Tolus lor ont les armes, ses ferent bien garder.
Cels qi herent la enz vont as crinias monter.
Mout fu fort le palés, ne feit a demander.
S’il heüsent da treire leianz et qe mangier,
Ne l’eüsent, ce cuit, rendus d’un mois enter.
Mais, si come celui qe se voit presoner
E qe ne puet ensir fors por merci clamer,
Conseilerent entr’aus de lor vie eslonger.
« Seignor », dist Filidés, « par Diex vos voil proier,
« Ne vos caille a morir, se porois escamper.
« Qe legist tot les feit q’ainc fu de ci arier
« De defandre citez, nos devroient loer
« Tant com por bien defandre tres qu’al pont dreoner.
« Soz ciel n’a hom qu’a droit nos in puise blasmer ;
« Encor de nostres ovres canteront menestrer.
« Mais ne peomes plus cist grant fais endurer :
« Entrevenuns de peis, sanz plus de resploiter. »
Les autres responderent : « Tot si soit volanter ;
« Al retreitier de peis, soiez nostre avoher,
« Salves avoer et vies et enfanz e moilier. »
- ↑ — 10240 uot as quuas — 10241 Mou fu forte — 10246 Conseileront, lor mees longer — 10252 home — 10253 monester
— 10232 por aiual ; paine doit être fautif ; mais comment corriger ?
