L’arcivesque le garde, s’a la color müee ;
La lance q’il manoie li a droite lancee,
Tiel colp li a doné parmi la pitrinee
Trosqu’au fil de la schine li a l’aste pasee,
Si que mort l’abati aval gole levee.
Adunc fu l’arbalestre de toise descochee
E feri un Normant qe servoit de soudee ;
La targe li escartelle, s’a la brune fausee ;
El cors fiert le quarel, l’arme s’en est alee.
Aprés reforcerent Saracins la meslee ;
Trairent dars et saietes, et l’ensaigne ont cacee.
La oit une bataile cruaus, desmesuree ;
Et ont si Saracins lor besogne ahastee
Che François reüserent pres d’une balestree :
Nes puet tenir Rollant, par dit ne por proiee,
Car plus de .ii.c i a qe la carn ont navree.
Or voit bien le niés Carles, quant voit Paiens defendre,
Qe sains orible perde ne puit la ville prendre.
Oliver se combat a la rue plus mendre
Vers la gient Dardanus, qe bien les font rependre,
E d’une part et d’autre, au partir dou contendre,
Avront asiez plaiés qe donier e qe spendre.
A prandre une citiez, tesmoign vos an puis rendre,
Jusque au tens Cesarie et dou magne Alexandre,
Ne oïstes lancier tant darz ni ars destendre.
« Cil Diex », dist Oliver, « citez, te puse ofendre
« Qi dou saint Paradis fist Lucibel descendre ! »
- ↑ — 9917 asiez de plaies — 9918 au puis — 9920 Ne ostes.
— 9895 oucle iert — 9896 mue — 9897 droite lance — 9899 Trosquã fil — 9900 g. lieuee — 9902 soude — 9903 fause — 9906 saites et lor e. o. cace — 9907 auaus desmesure — 9908 hahaste — 9909 rẽserẽt — 9910 Nel p. — 9911 nature