Enserer veult la porte avant qe nus li joigne ;
Mais Oliver le fiert, qe pais ne li perdoigne :
A rés a rés le spales la teste li reogne ;
Puis a sonez un graille, por qoi les autres poigne.
Quant au primer Paiens fu la teste copee,
Ou les autres portiers comença la meslee ;
Les dis lor bien ferirent, cascuns bien de sa spee.
Avant qe criz en fust et noise elevee,
I sunt tote la gient Oliver arivee.
Tote la bistiale des vaciers ont pasee,
Qe unqe n’i fu beste ferue n’adesee.
Mais des vaciers ploisors l’ont bien chier comperee ;
En traspasant lor ont donez mainte colee.
N’atendrent a cacier, mais por la droite stree
S’en venrent a la porte tut a une masee ;
Ne troverent Paiens n’aüst sa destinee.
Oliver prist sa lance, s’a la targe enbracee ;
Il e çascuns des dis a bien sa teste armee ;
Adonc ont lor banire encontremont levee :
De la tor de la porte n’i fu piere rüee.
L’ensaigne au quens Rollant ont par desor posee
E cascune des gardes prise et stroite lïee.
A l’entrer de la ville fu « Monjoie ! » crïee.
Vers la place s’en vont tot une randonee :
Ançois q’il l’aient prixe et dou toz gaagnee,
I lavront d’anbe part une grant sanglentee.
Oliver fu en la ville entrez tot primeran ;
