« Hor la preniés, douz fil. » Ce dit l’empereoir.
E quand Rollant l’entend, as piés li veit ceoir :
« Hey ! sir », feit il, « ce peüst remanoir !
« Ne place Dieu, que veust l’aspre mort boir,
« Tant com viviés, vous toile vetre honoir,
« Ains l’acroistray, s’en avray le pooir. »
Le roi le drece, pués munte ao cival soir.
Le roi drece suen niés pour sa blance man destre,
Muntier li fist sour le bay de Tolestre,
A destre part le mist, Salamon a senestre.
Le duc li veit contand cun sour Païene geste
Il avoit enduré grand paine e grand moleste,
E cun il combati Pelia le rubeste,
E sconfist Maoqidant, que tant avoit poeste,
E com a Anseïs il mist corone en teste
Dou regne Maoqidant, chand pour luy fist encheste,
E com ao retornier il trova en la foreste
Sanson le saint hermite, qe fu Romein ancestre,
E com em brais moruit dou chevaliers honeste.
A mot a mot li conte, sens parolle silvestre,
Tot si com ao scolier feit licion le mestre :
Li barons vont darier com li clerge ao preste.
L’emperer fu taisant e li barons ausi
Pour oïr e notier ce qe ou duc a geï.
Le duc li veit contant tot ce qe outre mer fi :
« Sire, ge ne voudroie etre remanu ci
