« La compagne Dairon metommes en demor ;
« Je ne veul plus de gient, car ce ert le peior.
« Sont a la nef tramis trestot nostres avor ?
— Sir, il i seront tuit dedens avant l’aubor.
— Va donc feir enseler nostre chevaus meilor
« E quatre palafroi qi soient de sejor ;
« Quant seront achouchié en citei et en bor,
« Si nos en alerons en non le Creator. »
Soldan dona congié a cescuns come syre.
La veïsés luisir maint estavaus de cire ;
Li barons vont chochier e de Perse e de Syre.
Sanson e le nevou dou segnor de l’anpire,
Marcel le patriarche e Sansons tut a tire
S’en vont a la roïne qui son enfant remire ;
Ja savoit q’il s’an veit outre mer a navire.
Dionés, sa seror, de duel a poi ne spire.
Cescune au congié prandre son gran mantel descire ;
En pasmeison cheïrent, dont Rolant s’en aïre.
« Doux fiuz », ce dit la mer, qant ele en soi revin,
« De ce qe jou dirai nus hon m’an port ahin,
« La vestre desevree por tant me maine a fin.
« Celui qi vos en maine est dou nible quisin
« Qui ne garde por ren a prendre le poucin,
« N’a dolor de le cloche, qe il ne le rapin.
« Douz fiuz, por quoi alés ou les outremarin ?