Pelias s’arme davant le rice roi ;
D’un armansor li sunt li fil tuit troi
Qui penerent a vestir son coroi.
Dessor le calces, qui fu d’un color bloi,
Une janbiere i mistrent sens desloi,
E par desus un esperon d’orfroi.
En estant leve, mantenant vesti soi
Sor un ganbois un blanc oubers Turcoi.
Clavan oit bon, covert d’un dras vermoi :
D’or et argent estoient tuit li cloi.
Dist Malquidan : « Gentil niés, garde moi.
« Ce sa je bien qe nul medre de toi
« Né çevaller non est in nulle loi.
« Se devés perdre por un fil de borçoi,
« Non sei qe fer se Macon non renoi. »
De ces parolles Pelias se gaba ;
Prist a froncher, et les oil roela ;
Son brant domande, et Gabor li aporta :
Ce fu la spie dun Açilés tua
Le bon Troillus, que Prian engendra ;
Villainemant l’oucist et asauta :
Paris, son frere, puis aprés le venja
Qant il li darç au tenple li lança
A celui jor que il parlamenta ;
Pollisinan a fame avor cuda :