Lors moille Karles d’angose e de sudor,
N’ouse parler por ceus qe sunt d’entor.
De Roxeillon parole dan Girard,
Li noble duc corajos e gaiard :
« Syre emperer, por li temp qi depart
« Vos tenoient plus saje e plus manard
« Q’encor fust roy ni François ni Lombard ;
« Mais an present petit fu vostre esgard,
« Car por orguel, qe sovant trop vos ard,
« S’an veit celui qe meis revira tard.
« S’adonque le seüst Malgeris l’Acopard,
« Ne vos doteroit mie si cum il feit li quart.
« Encor me manbre (ne sui pas si veilard)
« Q’entre nos fu ça guere e de gent grand esart,
« Quand volevés destrur Renaud et Adelard,
« Madalgis le lairon e son cosin Guiçard
« Par li consoil de cels qe ci en sunt en part,
« Tant qe Rolland, entre lui e Bernard,
« A l’acord fere nos conduit a Monmard ;
« Pois fu mon plege e lui e Durindard.
« Quand il s’en veit, je perd mon estendard :
« Aler m’en voil, le partir m’est trop tard,
« A Roxoilon o li carboncles ard.
« En vostre vie ni aieç de moi regard
« Se vos ni comencés par consoil de musard. »
Aprés parole li fils al duc Rayner
Pietusemant, dond altrui fist plorer :
