« A ce provier j’en sui bien aiutoire
« E fols seroit chi ce volist mescroire. »
Dist le Paiens : « Rollant, je ne mescroi
« Quant che tu dis, ch’autretés est ma loi :
« Diex fist le ciel et les angles, ce croi,
« E le faus angles, qe pensa teil desroi,
« Fist eslongier de son ciel e da soi,
« E pués forma sor la tere li poi
« E mer et haire et feu, et quant que voi
« Devisa il senz paine et senz enoi.
« En nulle rien ne mist ne main ne doi
« Fors solament en l’ancestre de moi :
« Cil fist de tere, por q’il n’eüst orgoi.
« De son costé li hosta cele foi
« Une des costes, si te dirai por quoi :
« La fame fist e dis : « Je vos otroi
« Cist paradis en joie et en sbanoi »
« Ch’il acresissente le monde e la loi.
« Amis Rollant, par la foi qe vos doi,
« Par quoi non soie bien sor la droite foi,
« N’avra tençons plus d’entre vos e moi.
— Saracins frere », ce lui respont Rollant,
« Forment m’agré qe tu es entendant ;
« Mais tu n’is mie dou tot reconoscant.
« Tu fais ensi com le viel penetant
« Ch’a bon viage se met subitamant
