Sachiés qu’il fu fils Julien Chesare,
Qui tint Hongrie, une cité sauvage,
Et Osterice et trestout l’yretage.
Constantinoble tint il tout son éage ;
.VII. liues grans fist faire entor murage
Qui va entor dusqu’à la mer sauvage.
Jules ot femme une fée mout sage,
Morgue ot à non, moult ot cler le visage ;
Cele fu mere Auberon le sauvage.
Huimais orrés canchon de fier lignage.
Signeur, oiés, que Dix vos puist aidier !
Si faites pais et laissiés le noisier,
S’orrés canchon qui moult fait à prisier.
De Charlemaine qui France ot à baillier,
Et de Huon, le nobile guerrier,
Et d’Auberon, le noble chevalier.
En son estant n’ot de lonc que .iii. piés,
Et s’ert faés, de vreté le sachiés.
Ce fu à Penthecouste, .i. haut jor enforcié,
Que à Paris tint cort Karlemaine li fiers.
Assés i ot Alemans et Baiviers,
Et Loherrens, Bretons et Hainnuiers,
Et Braibenchons, Angevins et Pohiers ;
Grans fu la cors des barons chevaliers.
Et des Engles i ot bien trois milliers ;
Li rois Tafurs i fu com chevaliers.
De Cambresis et d’Artois, ce sachiés,
En i ot mout de bachelers legiers
Qui volentiers ferroient sor paiens.
Li rois a fait sa grant table drechier,
Entre ses pers s’est assis au mengier ;
Mais li douzismes fu Hues au vis fier,
Cil do Bordiaus dont je veul commencier.....
Voici les rubriques du poëme :
