Puis li vest .i. hermin qui jusc’aval li (a)bat,
Heusses ot cordouanes, esperon[s] a esmal :
Rosamonde la bele par les flans l’enbracha,
Sor .i. lit l’a asis geteis a cristal ;
.Xl. fois li baisse et le vis et la char.
Cil li guenchi la bouche, que el n’i adesa :
« Galopin, » dist Elies, « vois quel feme chi a ?
U roialme de Franche si gente nen avra.
Car pleust ore a Dieu qui le mont estora
Je eusse chaiens et Gautier et Gerart
Et Guimer l’amoreus et le conte Aimart
Et Hugon de Paris et son compaing Guichart
Et Guillaume d’Orenge et son frere Bernart
Et Julien mon pere, le chevalier loial,
Et fussent adoubé d’armes et de cheval,
Et fussiemes la sus en el palais hautal :
Anqui le comperoiet li paien desloial. »
Elyes li vasaus a le fiere poissanche
Fu .xv. jors tout plains laiens en .i. canbre,
Que paien ne le sorent ne il n’i ot doutanche.....
« Gentieus nus a baron, vois con sui bele et gente :
.Vi. rois mout orgellous me quierent et demandent,
Clamador d’Abilant et .i. rois de Brehaigne
Et Hector et Turfier et Morin d’Abilande,
Lubiens de Baudas a la barbe ferande :
Ichil en est li maistres, que il a plus poisance.
Entre lui et mon frere en ont fait convenance
A bataille fremee par le fust de lor lances.
S’il l’ochist et afole, tous jors serai dolante.
- ↑ — 1485 Lacune — 1494 tout
— 1471 que il
