De ce tieng je Doon et a fol et a bric
Quant nul de ces perjurs a a ra[a]nçon mis :
Mieus les eüst fait pendre ou ardoir ou boulir.
Or s’en repaire Do ou chastel de La Roche,
Serjans et chevaliers enmoinne a grant flote ;
Argent et raançon a mervoille li offrent.
Onques ne tresfina s’est venus à La Roche,
Garder fait ses prisons en chartres et en fosses.
L. escuiers s’en torne, qui a esperons broche,
Tomile et Malingre va noncier la parole.
Sa fille demanda, qui ne fu mie fole :
« Que firent ores d’Ais li baron qui sont nostre ?
— A la moie foi, dame, malement se deporte[nt],
« Car desdu[i]s de puceles ne tables nes conforte.
« Mardi matin nos vint sire Do de La Roche.
« Si nos mist ses agais enz ou brul de Manople ;
« Danz Do nos [i] ocist Gilebert et Antoine,
« Asson et Gu[i]nemant et Raol de Vaudone,
« .XL. chevaliers li maus en est granz nostres »
Quant l’entendi Tomiles, duel ot de ses paroles :
Il a mandé ses homes par vertu et par force ;
Onques ne tresfina si vinrent a la Roche.
Tomiles et Malingres ont mandé lor compaignes,
Et sont .xl. mile as haubers et as lances.
