quant iceux chanoines voulloient yssir, faisoient appeler le geôlier ou il qui parle, qui leur venoit ouvrir les dictes prisons. Et aucune foiz que le dit geôlier ou il qui deppose estoient allés en la ville, attendoient les diz de chappitre que ilz fussent venus, et n’avoient onques ne demandèrent durant le dit temps les dis de chappitre avoir les dictes cléfz, ne que le dit geôlier se partist pour eulx, et plus ne autre chose n’en soit. Ainsi signé, Orenge. Collation faicte par moy. G. Sébire. Poolin.
Transcrit sur l’original, rôle en papier, long de sept pieds et demi.
« Informacion faicte, de par le roy nostre sire, par nous N… évesque de Bayeux, en l’an sur le descord meu entre les gens de l’église de Nostre-Dame de Rouen, d’une part, et les procureur et advocat du roy nostre dit seigneur ou dit lieu, d’autre, sur ce que, à la délivrance d’un prisonnier criminel qui est acoustumé estre délivre par chascun an, ou jour de l’Ascension nostre seignor, à yceulx gens d’esglise, pour révérence et honneur de monseigneur saint Rommain, yceulx gens d’église dient avoir acoustumé, aux jours qu’ilz examinent les prisonniers des prisons du roy nostre dit seigneur, ou dit lieu, avoir les cléfz d’icelles prisons, tant que eulx y sont, pour faire leur examen secrètement, le geollier des dictes prisons et sa famille mis hors d’icelles ou retrais en tel lieu qu’ilz ne puissent veoir ne oïr l’examen que yceulx gens d’église font, et le procureur et advocat dessus diz disans le contraire, et que les dictes cléfz doyvent demourer en la main du dit geollier.
Girot Dubosc, natif de Saint-Joire près Rouen, demourant, à présent, à Bacqueville, homme marié, aagié de 36 à ans, ou environ, examiné le vendredi devant Penthecoste, 25e jour du mois de may, ou dit an, juré dire vérité sur les choses dessus dictes, et circunstances d’icelles, dit et dépose que, pour l’an que le roy nostre sire, cui dieu pardoint, vint asségier la ville de Rouen, il estoit geollier de la geolle et prisons dessus dictes ; mais, pour ce que, après la rendue d’icelle ville, y eust grant charge de prisonniers, les aucuns d’iceulx prisonniers furent mis à l’ostel de la cloche, dont avoit la garde Jehan Lemoigne dit Lerotier. Dit que, de son temps, il a veu que les diz gens de l’église de Nostre-Dame de Rouen, venoient devers monsieur le bailli de Rouen, environ 15 ou 18 jours devant l’Ascension nostre Seigneur, lui insinuer le privilége saint Romain, et lui requérir qu’il ne
