Et si tiroye entre deux butes.
À brief parler, j’estoye ainsi
Mignon comme cest enfant-cy ;
Je n’avoys pas gramment plus d’aage…
Or ça, ça, par où assauldray-je
Ce cocq que j’ay ouy chanter ?
À peu besongner bien vanter ;
Il fault assaillir cest hostel.
Adonc apperçoit le Franc Archier un espoventail de
chenevière, faict en façon d’ung gendarme,
croix blanche devant et croix noire
derrière, en sa main tenant
une arbaleste.
Ha ! le Sacrement de l’autel !
Je suis affoibly ! Qu’esse-cy ?
Ha ! Monseigneur, pour Dieu, mercy !
Hault le trait, qu’aye la vie franche !
Je voy bien, à vostre croix blanche,
Que nous sommes tout d’ung party.
(À part.)
D’ond, tous les diables ! est-il sorty,
Tout seul et ainsi effroyé ?
Comment ! Estes-vous desvoyé ?
Mettez jus, je gage l’amende.
Et, pour Dieu, mon amy, desbende
Au hault ou au loing ton baston !
