Livre pour l’enseignement de ses filles du Chevalier de La Tour Landry/Chapitre 68
Je vous diray un exemple sur le fait d’envie de Marie, la suer de Moyses, qui dis par envie qu’elle estoit aussi bien de Dieu comme Moyses son frère, et que Dieu ouoit aussi bien ses resquestes comme celles de Moyses, et ce dit-elle pour soy moquer et par envie, dont Dieu s’en corrouça et la fist devenir meselle, tant qu’elle fust ostée et séparée d’entre les autres gens, et toutes voyes Moyses et Aaron en eurent grant pitié et firent requeste a Dieu qu’il luy pleust la guerir ; et à leur requeste Dieu la gueryt. Si prenez exemple comment il fait mal avoir envie sur autruy, et comment Dieu punist ceste-cy, qui estoit une des nobles damoyselles qui fust en celui temps, tant qu’il la sépara d’entre les autres gens par celle mesellerie. Car maintes foiz Dieu punist ainsi les envieux et les mesdisans. Et pour ce, belles filles, prenez y bon exemple, car trop est villain vice de soy louer pour aultruy abaissier.