Livre des faits du bon messire Jean le Maingre, dit Bouciquaut/Partie III/Chapitre XIV
CHAPITRE XIV.
Je baille ces exemples pour preuve que les jugemens de communauté de peuple ne sont mie tousjours à approuver : mais sont souventesfois à réprouver comme déraisonnables. Ce qui est toutesfois contre un proverbe que aucuns dient, qui dict : voix de peuple, voix de Dieu. Mais je dis que souventesfois est voix de diable ; comme apparut, quand le peuple ingrat de Jhérusalem cria contre nostre Seigneur Jésus Christ : « Crucifiez-le, crucifiez-le. » Et qu’il soit vray que raison n’y ait au jugement du peuple, Valère le tesmoingne, lequel, entre les autres exemples que il donne à ce propos, dit que un solennel musicien que on nommoit Antigenidas avoit une fois moult bien introduit un sien disciple en la dicte science de musique. Si jouoit par très grand art d’un instrument de bouche. Le maistre fit venir son disciple jouer devant le peuple, afin que son savoir fust congnu et apperceu : mais le rude peuple vilain et mal enseigné, qui en telle maistrise ne se congnoissoit, et qui telle mélodie n’avoit appris à ouïr, n’en fit compte, ains desprisèrent son savoir. Quand le dict maistre vit ce, il dit à son disciple : « Tourne toy vers ma face, et chante à moy et aux sciences. » Comme s’il eust voulu dire : Ces gens cy sont bestiaux, ils ne sont pas dignes d’ouïr telles choses. » Et à vray dire, tout ainsi advient-il souventesfois que maints vaillans gens, et bons en prouesse ou en savoir, sont et se trouvent en maintes places où leurs faits et leurs dicts ne sont point congnus ne réputés selon qu’ils ont mérité, mais semble que on n’en tienne compte. Mais non pourtant les bons et les saiges qui les voyent bien faire et bien dire, et qui se congnoissent en tels œuvres, ne les prisent pas moins, ains les honnorent et louent grandement, comme il appartient. Car vertu et vaillance, ou parfaicte science, tant soit-elle foulée, ne laisse pas pourtant d’avoir d’aucuns la louange que elle doibt avoir, et que en soy mesme la personne qui bien fait ne juge que l’œuvre soit bonne.