Les oeuvres poétiques de Clovis Hesteau de Nuysement 1578/Œil bel œil


IX.



Œil bel œil, ornement des hommes & des dieux,
Œil qui ciel, terre, & mer, d'un seul clin illumine :
Œil duquel ce grand œil qui luit par la machine,
Emprunte chacun jour ses beaux feus radieux,

Œil qui peux rendre clairs les enfers tenebreux,
Œil sous qui nuict & jour par l'obscur je chemine,
Œil qui peux asservir toute grandeur divine,
Par l'esclair enchanté d'un rayon gracieux :

Œil bel oeil qui bruslez & nourrissez mon ame,
Œil bel oeil qui dardez mainte amoureuse flame :
Au plus profond de moy esgarant ma raison,

Si vous m'avez blessé servez moy d'un Achille,
Si estes mon venin d'un scorpion utile,
Faisant naistre en mon mal ma propre guarison.