Les Singularitez de la France antarctique/Cardinal de Sens
A MONSEIGNEVR
de Sens, Garde des seaux de France,
F. André Thevet desire
paix et félicité.
onseigneur[1], estant suffisamment averty, combien, apres ce treslouable, et nô moins grâd et laborieux exercice, auquel à pleu au Roy employer vostre prudence, et preuoyant, sçauoir, vous prenés plaisir, nô seulement à lire, ains à voir et gouster quelque belle histoire, laquelle entre tant de fatigues puisse recréer vostre esprit, et luy dôner vne delectable intermissiô de ses plus graues et serieux negoces : i’ay bien psé m’enhardir de vous presenter ce mien discours, du lointain voyage fait en l’Inde Amerique (autrement, de nous nommée la France Antarctique, pour estre partie peuplée, partie decouuerte, par noz Pilottes,) terre, qui pour le iourd’huy se peut dire la quatrieme partie du monde, non tant pour l’elongnemêt de nos orizons, que pour la diuersité du naturel des animaux, et temperature du ciel de la contrée : aussi pource que aucun n’en a fait iusques icy la recherche, cuidans tous Cosmographes (voire se persuadans) que le monde fut limité en ce que les Anciens nous auoient descrit. Et iaçoit que la chose me semble de soy trop petite, pour estre offerte deuant les yeux de vostre Seigneurie, toutefois la grâdeur de vostre nom fera agrandir la petitesse de mon œuure : veu mesmement que ie m’asseure tant de vostre naïfue douceur, vertu et desir d’ouïr choses admirables, que facilement vous iugerez mon intention ne tendre ailleurs, qu’à vous faire congnoistre, que ie n’ay plaisir, qu’à vous offrir chose, de laquelle vous puissiez tirer et receuoir quelque côtentemêt, et où quelquefois vous trouuiez relasche de ces grands et ennuyeux soucis, qui s’offrent en ce degré, que vous tenez. Car qui est l’esprit si côstant, qui quelquefois ne se fasche, voire se consume en vacquant sans interualle, aux affaires graues du gouuernement d’vne republique ? Certes, tout ainsi que quelquefois, pour le soulagement du corps, le docte medecin ordonne quelque mutation d’alimens : aussi l’esprit est alleché, et comme semonds à grands choses, par le recit diuersifié de choses plaisantes, et qui par leur veritable douceur, semblent chatouiller les oreilles. Cecy est la raison pourquoy les Philosophes anciens, et autres, se retiraient souuent à l’escart de la tourbe, et enueloppement d’affaires publiques. Comme aussi ce grâd orateur Ciceron tesmoigne s’estre plusieurs fois absenté du Senat de Rome (au grand regret toutefois des citoyens) pour, en sa maison champestre, cherir plus librement les douces Muses. Doncques puisqu’entre les nostres, ainsi que luy entre les Romains, pour vostre singuliere erudition, prudence, et eloquence, estes comme chef, et principal administrateur de la triomphâte Republique Frâçoise, et tel à la verité, que le descrit Platon en sa Republique, c’est à sçauoir grand Seigneur, et hôme amateur de science et vertu : aussi n’est-il hors de raison de l’imiter et ensuiuir en cest endroit. Or Monseigneur, ainsi que retournant tout attedié et rompu de si long voyage, i’ay esté par vous premierement, de vostre grace, receu et bienvenu, qui me donnoit à congnoistre, qu’estes le singulier patron de toute vertu, et de tous ceux qui s’y appliquent : aussi m’a semblé ne pouuoir adresser en meilleur endroit ce mien petit labeur qu’au vostre. Lequel s’il vous plaist receuoir autant humainement, côme de bon et affectionné vouloir le vous presente et dediê, et si lisez le contenu d’iceluy, trouuerez à mon opinion en quoy vous recreer, et m’obligerez à iamais (combien que desia, pour plusieurs raisons, ie me sente grandement vostre tenu et obligé) à faire tres humble et tresobeïssant seruice à vostre Seigneurie : à laquelle ie supplie le Createur donner accomplissement de toute prosperité.
- ↑ Jean Bertrand, né en 1470, mort en 1560. Issu d’une des plus anciennes familles du Languedoc, capitoul de Toulouse en 1519, premier président au Parlement de cette ville en 1336. Transféré au Parlement de Paris par la protection d’Anne de Montmorency, il fut nommé premier président de cette compagnie en 1550, et garde des sceaux après la disgrâce du chancelier Olivier. Devenu veuf, il entra dans les ordres, et devint d’abord évêque de Comminges, puis archevêque de Sens, et, en 1557, cardinal.