Les Amours de Tristan/Le dépit corrigé


LE DESPIT corrigé.

SONNET


C'EST trop long temps combattre vn orgueil inuincible
Qui braue ma constance, & ma fidelité.
Ne nous obſtinons plus dans la temerité
De vouloir aborder ce roc inacceßible.

Tournons ailleurs la voile, & s’il nous eſt poßible
Oublions tout à fait ceſte ingrate Beauté,
Ne pouuans conceuoir qu’auecque laſcheté
Tant de reſſentimens pour vne ame inſenſible.

Mais que dis tu mon cœur ? aurois tu conſenty
Au perfide deſſein de changer de party,
Seruant comme tu fais vn obiect adorable ?

Non, non, celle que i’aime eſt d’vn trop digne prix,
Et tout autre Sujet n’est pas meſme capable
De faire des faueurs qui vaillent ſes meſpris.