Les Œuvres de Mesdames Des Roches/Madeleine des Roches/Sonnet 2
Abel L'Angelier, (p. 27).
Sur le Pole en certain compas,
Le Ciel graue & rapide tourne :
L’an en ſerpent ſa fin retourne,
Et reprend vie en ſon treſpas.
Las nous ne luy reſſemblons pas,
Le deſtin prend mieux qu’il ne donne :
Luy qui principe & fin ordonne
Guide noz pieds d’vn autre pas.
Noſtre chef ſans retour ſ’incline,
Mais celle part qui eſt diuine
Ne ſent les iniures du temps.
Ainſi voit on voſtre excellence
Tourner en la circonference
De ſon perdurable Printemps.