Les Œuvres de Mesdames Des Roches/Catherine des Roches/Chanson
CHANSON.
Ie ſens une froide crainte,
Qui me glace tout le cueur,
Ie crain que mon amour ſaincte
Eſprouve quelque mal-heur :
Iamais d’vn diuin preſage
L’homme ſage,
Ne doit eſtre deſdaigneux,
Ny peu ſoigneux.
Charite ma douce vie,
Las i’ay ſonge de vous voir
En vn marbre conuertie,
Sans parler & ſans mouvoir :
Et que voſtre face belle
Eſtoit telle,
Qu’elle n’avoit de ſentiment
Aucunement.
Ie penſois eſtre ſemblable
Au grand Dieu pere du iour,
Quand il plaignoit miſerable
Son infortuné amour.
Allors qu’vne eſcorce verte
Tint couuerte
La cauſe de ſon prier
En vn Laurier.
Ainſi ma chere maiſtreſſe
Soupirant aupres de vous
Ie vous pleins, ie vous careſſe
Et vous veux taſter le poux :
Mais vous eſtes froide & bleſme
Et moymeſme
Deſireux de vous toucher
Deuien Rocher.
Ayant perdu ma ſemblance
Ie ne regrette ſinon
De n’auoir plus de puiſſance
De chanter voſtre beau nom :
Pource qu’vne froide pierre
Cloſt & ſerre,
Ma voix, ma langue, & le ſon
De ma chanſon.
Comme la triste Niobe
Voyant tuer ſes enfans,
Sent le cueur qu’on luy derobe
Ainſi (maiſtreſſe) ie ſens
Et ma parolle, & ma vie
Deffaillie,
Ne me reſtant que la foy
Que ie vous doy.