Le Livre des sonnets/Tant que mes yeus pourront larmes espandre
Sonnet
Tant que mes yeus pourront larmes eſpandre,
A l’heur paſſé auec toy regretter,
Et qu’aus ſanglots & ſoupirs reſiſter
Pourra ma voix, & un peu faire entendre :
Tant que ma main pourra les cordes tendre
Du mignart Lut, pour tes graces chanter ;
Tant que l’eſprit ſe voudra contenter
De ne vouloir rien fors que toy comprendre :
Ie ne ſoubaitte encore point mourir.
Mais quand mes yeus ie ſentiray tarir,
Ma voix caſſee, & ma main impuiſſante,
Et mon eſprit en ce mortel ſeiour
Ne pouuant plus montrer ſigne d’amante :
Priray la Mort noircir mon plus cler iour.
Louiſe Labé.