Le Livre des sonnets/Sire, Thulene est mort ; i’ay veu sa sepulture
Au Roy
Sire, Thulene eſt mort : i’ay veu ſa ſepulture :
Mais il eſt preſque en vous de le reſuſciter :
Faictes de ſon eſtat vn poëte heriter :
Le poëte & le fou ſont de meſme nature.
L’vn fuit l’ambition, & l’autre n’en a cure :
Tous deux ne font iamais leur argent profiter :
Tous deux ſont d’vne humeur aiſée à irriter :
L’vn parle ſans penſer, & l’autre à l’auenture.
L’vn a la teſte verte, & l’autre va couuert
D’vn ioly chapperon faict de iaune & de vert :
L’vn chante des ſonets, l’autre danſe aus ſonettes.
Le plus grand different qui ſe treuue entre nous,
C’eſt qu’on dict que touſiours fortune aime les fouls,
Et qu’elle eſt peu ſouuent favorable aus poëtes.
Jean Paſſerat.