| ◄ Laisse XCVII | Laisse XCVIII | Laisse XCIX ► |
En l’ost furent paüreus les auquant,
A grant mervoile se dotent qe Rollant
Ne soit oucis, vencus ne recreant.
Ai ! com furent les presoners en grant !
Par ces fenestres alerent larmoiant,
Sovant garderent la bataille adolant.
S’il ont paor e dolors e gaumant,
Hestous de Lengres lor en feit quatre tant,
Qe lor a dit : « Or a je mon talant :
« Cels c’aloient tote gient manaçant
« Et en paroles cist segle conquirant
« Or ont trové ce q’il vont demandant,
« Or ont il prise Espaigne e Navarant.
« Belle senblance, par le mien esciant,
« En avront fete en le començamant !
« Bien le vos dist Gales o parlamant
« Che cels d’Espaigne ne voldront por niant
« Gerpir lor teres s’il ne sevront comant ;
« Un tot seul home en a bien feit senblant.
« Veez Feragu ; ancor est il vivant,
« Encor est il desor son auferant,
« Encor tient il a dos mans son perchant
« De quoi el fist le filz Milon d’Anglant
« Anjenoiler devant lui leidamant.
« Diés le garise ! mout lui vient malemant ;
« Penduz serois se il en est perdant. »
Dist Oliver : « Molt nos vais confortant ;
« Anch de maudir un jor ne fust taisant. »
Le quens Gerard respont ireamant :
« Se ne fusez, dam Hestous, mon parant,
« Mar eüsez, par sant Per, pleidé tant. »
Dit le Donois : « Par Diex le roiamant,
« Se je avoie mie spee trençant,
« Le cors me dit qe il iroit autremant ;
« Encor su jé d’ire caut e boilant
« Par la rampoigne dun je sui remembrant ;
« Venjerai moi, se je vif longemant,
« E bien poroie jurer por sagramant
« Plus coars home ne leit ne maudisant
« Ne sai de vos de ci en Bonivant.
« Queil, voir diable, alé vos divinant ?
« A vos qe feit se Feragu nos pant,
« Qe vos meïme apendrois ensemant ?
« Vos glotonies ne vos valdront un gant. »
Hestous l’oï, de grant ire s’esprant ;
Greignor ne l’oit a jor de son vivant.