| ◄ Laisse DCXXVI | Laisse DCXXVII | Laisse DCXXVIII ► |
Li qens Hue s’en torne, qi dou bois s’en insi.
Rolant e Sanson trueve, qe sor le converti
Estoient descendus, regretant lor ami.
« Vasal, tant mar i fustes ! », dit Rolant le ardi ;
« Nus hon de meilor aire onqe de vos non vi.
« Se veüs vos avist le roi qi me nori,
« Voiremant il avroit bien dit ce qe je di.
« Mout grant duel ai de vos, qant si m’estes ravi.
« Celui qi perdona Longins, qant le feri,
« En l’orde des martires vos face encué merci ! »
Mout le regrete Hue e Sansons autresi.
Aprés sunt conseillés li barons seignori,
Qu’il ne l’en poroient mie porter ensi
Por li mauvés aler de poi e guaut foili,
E pués ne savoient ou il fusent ausi.
A pointes des espees e de pechiés espli
Ont une fose feite, e si l’ont anfoï ;
De sing de sainte crois li fichent plu de si.
« Ami », ce dit Rolant, « bien vos lés a envi :
« Le sire le seit bien, qi le monde establi. »
A cheval monterent, pués s’en sunt departi.