| ◄ Laisse CXI | Laisse CXII | Laisse CXIII ► |
Or sunt el plans li barons devalé
Par vive force, tant se sunt ahasté ;
La ont ensanble tiel çanbiaus comencé
Trenciez lor ont lor escu enbaré
E les obers en plesor part dané.
Mout voit Rollant le Paiens alené,
Mout l’a le jor penez e travaillé.
Si formant fu le Paiens abravé,
Tot ensemant cum home forsené
Remist el fuere le bon brant açaré.
Remambre soi, ou camp se est encliné ;
Iluec avoit de pieres grant planté,
Une en a prise, si s’est amont levé,
Rollant la treit par moult roiste ferté.
Par le cançel de son eschu borclé
Par tiel aïr le consuet le Malfé
Che le cantons en a eschanteré.
S’adonc l’eüst par le piz asené,
A poine a Carles eüst mais repairé.
Rollant escrie : « Se je n’ai oblié
« De giter pieres, grant vantaje n’avré. »
Une en a prise, si la treit vers l’Asclé,
Par un petit che il no l’a versé.
En ceste gisse, seignors, che vos oié,
Sont longemant ensanble tastoné.