| ◄ Laisse CLXXVII | Laisse CLXXVIII | Laisse CLXXIX ► |
Quant Oliver entant ch’al roi non ploit
Oïr mesaiges et si nief le leisoit,
As Saracins mostre Rollant al doit.
Cun un dulz vis qe müer non savoit
Se treit Rollant la o li Paiens voit.
Li troi mesajes, qe grant paor avoit,
Devant le duch s’ajenoilent a droit,
Salüez l’ont de cil Diex o il croit,
Pués li distrent quant qe cargiez li estoit,
Coment Paiens batiçer se voloit,
Garpir Machon, Apolin e Margoit,
Salves lor vies e l’avoir q’il tenoit.
Rollant li entant, el cuers grant joie en oit ;
Dist a Oliver : « Que volez vos ch’en soit ?
— Sire », dist il, « grant daumaje seroit
« Se tante gient sens batisme moroit ;
« Chi mercé clame, biaus sire, avoir la doit. »
Respont Rollant : « E pardonez lor soit ;
« Quant vos agree, dahait chi ne l’otroit ! »
Lors li baisa et acola estroit ;
Fors qe son oncle plus d’ome vis l’amoit.