| ◄ Laisse CLXVIII | Laisse CLXIX | Laisse CLXX ► |
A grant merveile fu le Paiens lassé ;
Anz ne fu si a jors de son ahé.
Rollant le maine et avant et aré
A l’escrimir don bon brant açaré.
Si come feit le pastor corecé
Canger se bestes da un en autre pré,
N’i lese avoir en un leu fermité,
Tot si Rollant a celui travailé.
Le niés Marsille fu si fort alené
Que de suor fu il trestot moillé
E sor la boce de grant ire esclumé.
Volantier fust le repois demandé,
Mais le niés Carles s’an veit penant asé :
Com plus le voit sorpris et estanché,
Il plus l’ahaste al brant d’acer tempré.
Lor se est le duc dou tot abandoné ;
Aval d’un col o il estoit monté
Se mist a corre par si roiste ferté
Que tot en fu le Paiens esfraé.
En la venue a son eschu geté ;
Mais cil qe vient plan de grant volenté
L’a de la ponte dou bon brant estoché ;
N’i vaut l’eschu un mantel desforé ;
Ja n’oit l’obers al bon brant poesté :
La o termenie de l’ome la moité,
La o Nature veult par necesité
Que ceschuns home convient estre taillé
(C’est l’enboreil), l’a le duc asené ;
Nuls garnimant dont il fu adobé
Ne vaut al colp qe tot non soit dané.
Le brant i mist deci qu’en le fïé.
Cil gete un cri, l’espirt en est alé ;
Celui l’en porte qe bien l’a gaagné.
Si com la tor, quan ronpus est le pié,
Chiet e decline, tot ensi fist l’Asclé.
Le duc Rollant au frans cors honoré
Trestot sanglant en a lo brant saché ;
Devant son piez l’a mantinant gité.
Vers Oriant s’est tantost jenoillé ;
Tendi ses mans ou Roi de majesté
E, larmoiant de joie e de pieté,
Dist autemant : « Tu soies merceé,
Ch’is Diex et home e fus de vergne né ;
Ancué ais bien ton miracle monstré.
Homeis seront le chetis delivré
Que par toi sunt en grant dotançe esté. »