| ◄ Laisse CCV | Laisse CCVI | Laisse CCVII ► |
Le voloir sun enfant roy Malçeris otroie ;
Quatre mil Saracins li livre q’il convoie.
De la cité ensirent, ceschuns li espleu palmoie ;
Tot droit a la bataile vindrent la droite voie.
La masnie Gerard le voit, si s’en esfroie ;
Mais Hestos li sorvient, armeis, sor bai d’Ançoie ;
Deci que al gran capler li baron ne deloie.
Corsabrin encontra, qe les François mestroie ;
Gran colp i veit doner en l’eschu qi flamboie ;
Desor la borcle ad or li porfend et estroie
E la broine trença por desor la coroie ;
Por mi le gros del cor li fer el fust li envoie ;
Mort l’abat estendus sor l’erbe qi verdoie ;
Pois a traite la spie, quand la lançe peçoie ;
Cui il en fiert un colp, merveile est se il non ploie ;
Sanglant a feit le brand deci qu’en la manoie ;
Ne croi pas qe le quart d’une leigue aleroie
Qe plus de .xx. n’a oncis qe mai plus non geroie.
Li homes Corsabrin por partir se desroie,
Qe François se ralïent come lous a la proie,
Car le pros quens Hestos lor feit confort e çoie.
Ansi vont a ferir come fust un sbanoie ;
Ja s’en fuient Paiens — qe plu vos en diroie ? —
Quand sorvient Ysorés, qe mais ne se desloie.