| ◄ Laisse CCCXXXV | Laisse CCCXXXVI | Laisse CCCXXXVII ► |
François s’en vunt, Alvernois e Pichart.
An miels che poit lor en conduit Gerart
E l’arcivesches, che nostre Sire gart.
Li rois Grandoine les detrance e depart :
Oncis nos a Aubri, li fils Brochart,
E la bandere dan Rolant painte a quart
En fist porter a un Turch de Baudart.
Li fiuç Milun, irez cum liopart,
Refist drecier li bon destrer liart,
Aprés li broce cun un senblant gailart ;
O voit Paiens, se treit en cele part.
Devers senestre perduit li niés Çirart :
De l’acouler as barons sanble tart.
« Sire compan », ce dit li niés Bernart,
« De la jent Çarles ai feit mauvés regart ;
« Honiç me voi e tenuç a cohart.
« Por Diés vos pri e por saint Leonart,
« Sor cil darer alons feir un esart ;
« Encor me croi sanglenter Durindart. »
Dist Oliver : « Nenil, se Deus vos gart,
« Jentil queins sire : de vos jent la plus part
« S’ent sunt fuïç a travers ces desart.
« Deus ! por quoi tarde nostre sir de Monmart ?
« Trop nos delaie Hue, li fil Ponçart,
« Quant ne nos maine Salemons e Ricart.
« Alons nos, sire, avant che soit plus tart,
« Car se Paiens tornasent au stendart
« Ver nos seguant, nos i pairons musart :
« Por un de nos sunt bien cent Acopart. »