| ◄ Laisse CCCXXXVIII | Laisse CCCXXXIX | Laisse CCCXL ► |
Por les paroles che fu dau duch au rois
N’i a baron chi non fust muç e quois.
As tendes sunt repaireç nos François,
Hostent lor heumes e treirent lor hernois.
Rolant desent dou vair Saragoçois ;
Au desarmer ne fu mie borçois,
Mais quatre fiuz de queins palatinois.
Sor une coutre lavoru en Greçois
S’asist le duch, coroceus e destrois.
Gerart, Hestous et Oliver tut trois
E Ençeler, che fu de Bordelois,
Vinent a lui, e dans Hue de Blois ;
Asés li unt parlé e ne pas de gabois.
Rolant lor conte belemant, senç desrois,
Tot li afeire, pois dit : « Signor, veois
« Se l’emperer me feit a tort sordois.
— Sir », dit Estous, « ver lui n’avrés ja drois.
« Por les paroles ne vos mostreç irois,
« Car il poit dir se feir tote fois ;
« Cestui forfait por tans amenderois.
« Alons super avech lui demanois,
« Che, se Diés pleit, li pere gloriois,
« Che nos trovuns avech li Espagnois,
« Qui ne s’en vanje, pois ne li prise un pois. »
Entre Hestous e Oliver li cortois
Lever li firent, e desor li gambois
Li funt vestir un mantelet Thiois ;
Sa spee i porte Teris les Ardenois ;
Au tres Çarlon s’en vunt senç nul repois.
Mais de parole fu Rolant si grevois
Qu’il le mostra avant compli li mois.