◄ Laisse CCCCXXXV | Laisse CCCCXXXVI | Laisse CCCCXXXVII ► |
Brocerent vers la place les barons de bon aire.
Hai ! com est asotie gient qi vers teil contraire
Qe ne dotent por mort de lor nemis desfaire !
Hestous fiert Promodés, q’estoit jendre Gillaire,
E cil refiert bien lui, qe nel redote gaire ;
Les eschuz trencherent come fust cordevaire.
Forz furent les hobers, de cels m’aconvient taire ;
Andeus s’entrabatirent lez un peron de quaire.
Hestous se leve et treit le bon brant qe resclaire
Et Promedés le suen, qe fu feit en Samaire.
Grant cous se donerent, l’estoire les nos naire.
Atant ec vos Gerarz outre tote lor baire :
Promodés veit ferir tres par mi le sudaire
(Ne garde por Hestous qe l’en deüst desplaire) ;
La boce e le mentons et le nés e la naire
Li a tote trencee come se fust une haire ;
Mort l’abati a tere, ainc n’oit laiser de braire.
Lor veïsez Paiens trestoz cele part traire ;
Anz que poüs Hestous monter el dormendaire,
Il furent mort des Frans plus de quatre cent paire.