| ◄ Laisse CCCCXV | Laisse CCCCXVI | Laisse CCCCXVII ► |
De totes quatre part, l’estorie nos temoigne,
A bien Bernars de Meus fornie sa besoigne.
L’endoman por matins, quant nuit de jor se loigne,
Li portier de la ville, qe n’ont peor ne soigne,
Ovrent porte Paris, ond l’on veit en Gascoigne ;
Li vacers s’en istrent ; n’a cil beste n’i poigne.
Oliver, quant les voit, ne senbla mie moigne ;
Dis chevalers apelle, qe furent de Bergoigne ;
Les escus e les lances els elmes de Colloigne
Laisa çascuns as autres ; lor n’a celui ne poigne.
Oliver fu devant e Ranbaus de Coloigne
E li .viii. chevalers, qe la ville caloigne.
A esperuns batuz, a qi q’en alt rampoigne,
Sunt entrez en la porte ; ne leirent por vergoigne.
Un Paiens su salli, soudoier de Sansogne :
Enserer veult la porte avant qe nus li joigne ;
Mais Oliver le fiert, qe pais ne li perdoigne :
A rés a rés le spales la teste li reogne ;
Puis a sonez un graille, por qoi les autres poigne.