| ◄ Laisse CCCCLXVI | Laisse CCCCLXVII | Laisse CCCCLXVIII ► |
Iriez fu li niés Carles par le colp al Païn.
La primere venjance torna sor Vaillantin.
Les costez i sanglente as esperons d’or fin
Si qe l’erbe en rogist environs le chemin ;
Plus tost qe ne desant nul faucons peregrin
L’en porte danz la prese le bons Amoravin.
Landrais al trapaser le garde al chief enclin
E dist : « Qi t’atendra avra felons vesin.
« Si voir cum tu is le niés Carles le fil Pepin
« Ne mais plus ne te vi, te confonde Apolin !
« Mon seignor m’oncesis, Feragu Barbarin ;
« S’orendroit no le vange, ne me pris un sterlin. »
Lors se mist en l’estor pres lui a grant traïn ;
Ja ne s’en partira sens mortiel disiplin.
Li quens tient Durendart, veit ferir un Païn,
La teste en feit voler et l’eume Pitaïn ;
Pués feri Corsidés, le prince de Monfrin
(Cil portoit la baniere Landrais, d’uns estorin) ;
Trosquemant en la renge de son brant acerin
Le veit tot parfendant com se fust drais de lin ;
Cil bien compra l’eror dou conte palatin.
Escriant vient Landrais : « Hai ! enrajés mastin,
« Dragons pericolos, condurais tut a fin ?
« Guenchis encontre moi, qe sui cief de ta fin.
« Maint jentis chevalers ais oncis por engin,
« Qe tut les vengerai sor toi et sor ton lin. »