Iconologie (Cesare Ripa, 1643)/I/Experience
Experience. LVI.
’Est vne vieille Femme veſtuë de gaze d’or, qui
de la main droite tient vn carré Geometrique,
& de la gauche vne Baguette, auec vn Rouleau
tout à l’entour, où ſont eſcrits ces deux mots,
Rerum magistra, c’eſt à dire, la maiſtreſſe des choſes ;
outre qu’on peut remarquer à ſes pieds vne pierre de touche,
& vn Vaſe, d’où s’euaporent des flammes.
6. Eth. Elle eſt repreſentée vieille, pource, dit Ariſtote, qu’elle eſt la creature du Temps.
Car elle ſe produit par l’aage,
Et fait par vn diuers vſage
Ce que l’Art ſujet à ſa loy
A de plus admirable en ſoy ;
S’il aduient qu’elle ſe rencontre
Dans le chemin que l’Exemple luy monſtre.
Son habillement eſt doré, à cauſe qu’elle a le meſme auantage ſur les Sciences, que l’on donne à l’or ſur tous les autres metaux. Ce n’eſt pas auſſi ſans vn grand myſtere, qu’elle tient en main le carré Geometrique ; Pource qu’auecque cét inſtrument, en diuiſant ſes degrez, & multipliant ſes nombres, l’on treuue par vne experience infaillible, la hauteur, la profondeur, & la diſtance des choſes. Ce qui nous eſt pareillement declaré par ſa Baguette ; qui monſtre qu’elle regente icy bas, & que ſans elle on ſeroit aueugle dans la connoiſſance des Arts, & des affaires du monde.
Auecque tout cela, le feu qui ſe void à ſon coſté ne luy eſt Lib. 12. pas mal conuenable, d’autant que ſans luy, comme dit Boccace dans ſa Genealogie des Dieux, nous ne ſçaurions pas vne infinité de belles choſes, que l’Experience nous monſtre. Car c’eſt luy qui agit à la perfection de l’or, de l’argent, & de tous les autres metaux ; Luy qui dompte le fer & le bronze, qui ſepare le pur d’auecque l’impur ; & qui par d’eſtranges metamorphoſes, change le noir en blanc, les herbes en verre, & le bois en cendre.
Pour ce qui eſt de la pierre de touche, c’eſt à fort bon droit qu’elle figure l’Experience, en eſtant vne infaillible du prix des metaux, & particulierement de l’or.